Concurso de Poesía Escurecida
REDESCUBRINDO A FORZA DAS PALABRAS PROHIBIDAS
Castelao: 75 anos de legado
1 Obxecto e finalidade
No próximo 7 de xaneiro de 2025 é o 75 aniversario do falecemento de Castelao, unha das persoas máis importantes da nosa Historia. Por iso, queremos homenaxealo e animar a redescubrilo a través do seu ensaio Sempre en Galiza, que é tamén a obra máis censurada de toda a literatura galega (que xa non é unha literatura onde rareen as obras censuradas).
Convidamos a coller unha páxina de calquera edición do Sempre en Galiza (mellor fotocopiala, de ningún xeito a arrinques!) e aplicar nela as técnicas da chamada poesía escura ou escurecida, tamén coñecida pola súa denominación en inglés, blackout poetry. Este método creativo consiste en coller a páxina dun libro e ir riscándoo de xeito que só fiquen ao descuberto algunhas palabras, que conformen un novo texto, diferente ao que existía na orixe.
Que mellor homenaxe para podermos sentir a forza das palabras prohibidas!
Esta iniciativa forma parte do proxecto Escollemos Galego, que desenvolve neste curso 2024-25 o IES San Clemente, de Santiago de Compostela. Riscaremos (e, desta vez, para ben) un libro esencial da nosa cultura.
2 Categorías de participación
A Estudantes de secundaria de calquera lugar do mundo.
B Persoas de calquera idade de calquera lugar do mundo.
C Estudantes do IES San Clemente, en calquera das súas modalidades.
3 Formato da obra
Cada creación poética debe basearse nunha páxina do Sempre en Galiza, de calquera das súas edicións.
As obras entregaranse obrigatoriamente en formato dixital, resaltando as palabras ou frases seleccionadas e escurecendo o resto.
As creacións deben ser orixinas e inéditas. Cada participante poderá presentar unha única obra.
Valoraranse a creatividade, o sentido e a coherencia da obra que se entregue.
4 Prazo de entrega
As obras presentaranse até o 30 de xaneiro de 2025, aniversario do nacemento de Daniel Castelao.
Enviaranse por correo electrónico a: edlg@iessanclemente.net
5 Premios
Entregaranse dous premios por cada categoría de participación:
1º Premio: Vale de 100 euros e un lote de libros en galego.
2º Premio: Vale de 75 euros e un lote de libros en galego.
Ademais das obras galardoadas, poderán seleccionarse outras para a súa difusión a través das redes sociais e outras publicacións do IES San Clemente.
6 Aceptación das bases
A participación no concurso implica a aceptación destas bases.
